利申--純粹係流水帳記低翁導同呢齣戲相關言論, 勁無聊與沉悶, 如頂唔普請從此字即離頁! 如不幸得錯愛想引用則無任歡迎. (但估計發生機會係零, 應比白髪魔女破15億更難! 張之亮導演真好似翁導)
我前天晚上係電影資料館睇嘅版本已改名重剪為<<迷城之旅>>.
翁維銓導演被問到呢齣戲時, 少少勞氣咁話, 姚緯小姐日日換衫, 拍十幾日換足十幾套衫, 仲話依家講都唔驚啦--應係因姚小姐退隱假假地叫名媛, 關心她名滿天下嘅斷背女兒趙小姐更多-不會理呢停陳年舊事. 新版中姚小姐剪剩一個背影, 角色劇情全被刪走, 變動即係無咗她嗰份, 其余同豆瓣無大區別, 最後嚟開放結局, 男豬腳-思維先生 (藝名不俗) 找到古物離開, 他旁白講會返來, 當然無拍出來, 最後一鏡是女主騎馬走草原的凝鏡.
全片大漠風光, 萬里狂沙萬里愁 (借用<<西部往事>>港名), 導演直言自己好傻好天真, 自語"憨居居食煎堆", 仲講咗唔止一次, 話自己傻到係死都要去返嗰古戰場嘅真正遺址度拍- 意思係要拍沙漠啫, 唔使去到咁山卡啦, 近近地 (烏魯木齊附近D或者蘭州隔嚟-我斷估) 大城市邊邊地沙漠照拍咪掂, 電影話係邊度, 觀眾點知就會信, 萊昂內導演開頭都係西班牙沙漠扮老美西部--沙漠無其他嘢係度塊塊睇落都係咁. 偏遠關係, 運輸啊食水啊沖菲林 (未到數碼年代-要睇片要沖印出來-要去到東京度沖), 嗮咗大量時間人力物力金錢.......
仲連金馬獎要頒獎, 他<<再生人>>提名最佳導演, 他拍緊呢部就唔去, 但原來臺灣請他去, 內地也想他去, 翁導話直頭要攞槍指住要我去, 仲話真事, 但自言"年少乜啊", "年少氣盛" 幫手主持嘅好友著名影評人羅卡先生幫他講埋....."係啊, 最後無去到......."
翁導回憶話同內地商量要去西北拍戲, 錢一邊出一半, 得到好多支持, 係長春八一上海等制片廠搵人嚟幫手, 每次出大貨車多架幫手運嘢, 他自己就坐吉普, 地點係天山北邊, 其實係禁區, 凈因拍戲先入得. 坐飛機到烏魯木齊, 轉火車, 再轉汽車, 遠到呢....咁麻煩真無可能中間走去臺北, 來回轉車暈死....
最傻係沙漠掘坑拍一場綠洲水潭把馬掩沉嘅戲, 要倒水整個水潭, 倒咗好多水都沒咗, 摻到沙入邊, 沙吸水, "好傻! 無捻到要放一塊膠膜先!!"
年代久遠, 翁導一邊飲啤酒(仲問準了我地影迷後)一邊講, 慢慢講應要慢慢回憶, 時時醒唔起個咪(麥克風)要攞近嗰嘴, 女粉絲大聲提他"個咪啊", 無法子講多些拍攝逸事, 仲話講兩粒鐘, 邊有咁多料.
套戲睇大漠風情為主, 賽馬大賽, 成班人雜亂飛馳, 贏家有只駱駝. 叼羊大賽, 將只肥羊搶來搶去, 港影迷應從未睇過, 我係<<冰山上的來客>>睇過啦.
新鮮馬血解蛇毒, 倒聞所未聞, 推測是草原的馬遇蛇機會大, 是否馬被咬過沒事, 可能對蛇毒有抗體, 當地牧民試過有效, 跟導演說起, 就放進電影.
哈薩克族結婚儀式, 唱歌跳舞彈的...冬不拉吧.
翁老師看了很多考古書, 展現考古做法同手法, 演員手勢似模似樣, 專業嘅會不會睇到破綻?
老師攝影家出身, 多個鏡頭如詩如畫, 而戲院門外也展出他當年畫嘅分鏡圖, 影像先行的人如讀美術的(李翰祥胡金銓楊德昌)攝影的(張藝謀何藩)做導演呢方面有優勢.
無姚緯後主線 配合新片名, 迷城難尋, 少女心也難尋, 迷城找到之際也就係美少女救人之時, 而齣戲開頭有段考古部門揸fit人訓話情景, 鏡頭一轉, 一內地真正考古人即笑對男主說官腔好討厭, 之後發展-上頭"顯世"佢地鼠目寸光同對外來人 (流行說法黃皮白心) 并不信任, 順便開多瓣沖突, 取代嗮所有的"姚緯".
并非左派電影人卻咁早入內地拍戲, 仲要係大西北, 翁導卻話呢個第一只係他貪玩, 想四圍去, 想去邊度咪話拍戲咁咪去得啰, 再豪飲, 大細路, 赤子心, 可能他無跟風拍商業片嘅原因, 但他再次否認, 話只係懶散, 是"命"(要讀"咩"的第一聲).
